Isaky ny manao seho goavana, miezaka mitady izay hampiavaka izany mba hotsaroan’ny mpankafy foana i Njakatiana. Anisan’ny niavaka tao anatin’ny maro anefa ny « Du jamais vu », izay notontosainy ny 27 novambra 2009 tao amin’ny lapan’ny Fanatanjahantena Mahamasina, ho an’izay nahatsiaro.
Fantatra izao fa hisy andiany faharoa ny « Du jamais vu », izay hotontosaina ao amin’ny lapan’ny Fanatanjahantena ihany, ny zoma 29 avrily izao, manomboka amin’ny 7 ora hariva. « Seho raitra, hiavaka amin’ny haingon-tsehatra sy lafiny teknika no tena tanjona, ary iarahan’ny rehetra mahafantatra fa sarotiny amin’izany i Njakatiana », hoy ny filazan’ny mpikarakara avy ao amin’ny M Pro.
Lafiny hira, hiverenana avokoa ireo hira rehetra nanamarika izay taona maro nilomanosan’ity mpanakanto ity tao anatin’ny mozika izay. Manome fofony izany ireo rakitsary mandeha amin’izao fotoana, toy ny « Meteza hahatsiaro » , sns. Tsy vitan’izay fa hasain’i Njakatiana avokoa ireo mpanakanto rehetra niara-nampiara-peo taminy hatramin’izay, mba hifampizara ny sehatra aminy amin’io fotoana io.
Zo ny Aina