Azo lazaina ho nahafinaritra tokoa ny zoma teo ho an’ny mpankafy « cabaret », na noheverina ho nangingina aza izany noho ny maha fiandohan’ny taona. Tsy tana ary tsy nisy nahasakana ireo mpankafy tarika Olombelo Ricky ny ho tonga tetsy amin’ny Piment Café etsy Behoririka. Marobe izy ireo no nanoina ny antso, « Adalan’ny te ho any aminao… ». Na ny mpanakanto na ny mpankafy azy, samy niandry fatratra ity fotoana ity; fotoana nifampiarahabana nahatratra ny taona ihany koa.
Tsara ny manamarika fa tsy vao izao ny Piment Café no nanolotra ny tarika Olombelo Ricky amin’ny fiandohan’ny taona toy izao. Zary lasa fahazarana izany ho an’ny mpankafy. Fahombiazana hatrany ny hetsika, toy ny tamin’ny taon-dasa izay nifampizaran’i Ricky sy Lalatiana ny sehatra ka nampiakatra avo ny hafalian’ireo tonga nanatrika izany.
Tsy misy fiatoana ny seho sy ny hetsika samihafa ho an’i Ricky manokana. Nandritra ny « Mozika avotr’aina » no nahitana azy, amin’ny maha mpikambana azy ao amin’ny Madagascar All Stars, nialoha izao.
Landy R.