Mampifandray ny mozika ! Izay no azo amehezana ny vokatra hoentin’i Volahasiniaina Linda sy Raboussa an-tsehatra, rahampitso hariva etsy amin’ny Institut français de Madagascar (IFM) etsy Analakely. Tsy zovina amin’ny maro intsony i Volahasiniaina, ilay tovovavy ikoizana amin’ny fitendrena karazan-javamaneno maro, toy ny valiha sy ny kabosy ary ny amponga. Anisan’ny sangany amin’ny rap kosa ny tarika Raboussa, izay tsy mbola lefy laza na maro aza ny tanora misondrotra amin’ity gadona ity.
Araka izany, tsy ampoizina ny fiarahan’ny roa tonta an-tsehatra. Marihina fa tsy ifandimbiasan’ny tarika roa ny fampisehoana fa iarahan’izy ireo, hatramin’ny voalohany ka hatramin’ny farany. Tsy mbola fandre sy fahita ny kanto hatolotr’izy ireo. Hahazo tombony manokana ireo tonga hanatrika izany eny an-toerana.
Landy R.